DONGENG PANYELANG (BUDI DAYA 13)

S : Samemeh nampi kana cariosan engkang di luhur , rayi bade tumaros dina leresan anu teu ngartosna.

D : Har karah aya nu teu kaharti ku rayi ?

S : Kantenan aya mah, nyaeta dina leresan sajatina kuring, jeung jalan-jalan manutan ka Guru geusan panutan urang tea.

D : Jadi rayi teh rek tumaros dimana ngancikna kuring, kieu rayi urang na mah tadi oge diterangkeun yen hanteu arah hanteu enggon, ceuk dalilna mah "Billa haefin billa mukanin" , malah ku ahli elmu Haq mah aya oge nu terus mi Allah ka Ingsun , nyebutkeun ngadegkeun bumi langit teh ku ayana urang, da lamun euweuh urang mah, moal aya naon-naon , nu kieu oge bener, ngan hanjakal teu kebat nyungsina, benerna mah sanggeus terang ka Ingsunna terus malik nincak tahapan ilmu (kanyaho), kang adadidayaken alam kabeh, lan kang sinembah siang kalawan dalu, anging Gusti Kang Maha Suci (Bismilahi).  

S : Sumuhun atuh anu mana, da rayi mah hayang sidik, kapan ari anu kasebut aya mah tangtu aya datna, aya sifatna. 

D : Kieu rayi ari dat, sifat mah; mohal aya dat lamun euweuh sifat, mohal aya sifat lamun euweuh dat, sabab ayana dat tangtu tina sifat, kapan ari urang mah disebut dat, da puguh tetela nu aya mah jirim, dituduh sifat da nu aya puguh jisim, tetela ayana teh dina sajatining suwung, suwung oge lain suwung elmuna, sare'atna nya-eta nyebut suwung teh kana lolongkrang dunya, kitu oge lamun teu nyahoeun yen alam pinuh ku hawa-hawana. Ieu mah hakekatna suwung teu aya ancikaneunnana, ceuk basa Jawa mah aya dina kubur kang alus jisim kang lantip. Jadi ieu mah disebut aya teh, lain aya anu kasaksi ku pancadria lima, tapi ayana teh karasa jeung katingal ku awasna per Elmuan. 

S : Geuning ku salah sahiji elmu hakekat nyebutkeun yen urangna teh hakekina Muhammad, anu matak sok dititah tirakat supaya ma'ripat ka dinya, samangsa-mangsa geus ma'ripat ka dinya syah enggoning jadi sucina, sabab, Haq Muhammad Haq Allah anu dalilna : Illa haki bila haka, eta kumaha cing mangga terangkeun deui.

D : Eh rayi naha bet leos kadinya, atuh mangke kaliru deui, nu disebut hakekina Muhammad mah, lain urang tapi jisim, geuning disebutna oge Muhammad hakeki, ari jirim kapan Muhammad majaji, enya ari Muhammad Hakeki jeung Majaji mah kapan Rahman Rahim Pangeran, nya pantes disebut Hak Allah, hartina sifat Allah, anu nyifat dina insan, ari urang mah tetep barang kajadian tina Rahman Rahim Pangeran; ari eta rayi nu disebut Hakekina Muhammad ku elmu tarekat mah, kapan Johar Awal tea, bibit saeusina alam kabeh, ari nu matak bisa katingal sabab sajatina sare'at, eta ditutup, saperti irung, panon , ceuli, sungut. Eta pancadria dipepetan, turug-turug mentas tirakat, nya tangtu rayi kana ngaburinyai teh. Ari mestina mah anggur buka bukakeun sangkan Hayat, Sama, Basar, Kalam hidayat ti Pangeran beunang dipake ku sarerea, hartina, boga elmu ulah ditutup, pangabisa ulah disidem, anggur sebar-sebarkeun, etang-etang berjama'ah, sing emut kana suluk kacirebonan, dina tangga Gunung Sembung, dina tangga ka tilu mah, ngan panggih jeung kuburannana putri Cina anu sabeulah kajero sabeulah ka luar. Hartina : sanajan jembar pangawasa (Kudrat), loba Kadaek (Iradat) jeung pinuh Kanyaho (Ilmu) lamun teu daek berjama'ah alias ngamonopoli elmu, tetep dina martabat sapotong Islam sapotong Kapir, anggur tangga nu opat deui geura bukakeun, nya-eta kudaek berjama'ah tea, ngabukakeun Hayat, Sama, Basar, Kalam, kakara panggih jeung kuburan Syeh Sarifhidayatullah teges Hidayatna Pangeran anu bakal nungtun ka sagara Kasampurnaan. Jeung deui ari rupana Nur Muhammad mah moal katingal ku panon kapala moal katingal ku panon kolbi, da kaayaan nu kitu teh lain pikeun lalajoaneun geusan maen toong, tapi pigeusaneun manusa daek amal ibadah, tahapan mulih ka jati mulang ka asal tea.

S : Leres, ayeuna rayi geus ngartos, ngan rek tumaros deui kaayaan centraal atawa sagarana, dina leresan jirim jisim jeung urangna.

D : Kieu rayi eta mah, jirim kapan tina cahaya Jan, nya ari Jan oge, ayana teh asal tina Kudrat, Iradat, Ilmu, ari sagarana nya Wujudullah, ari jisim kapan ti Nur Muhammad, Nur Muhammad tina Hayat, Sama, Basar, Kalam, ari sagarana nya Rasullulah, ari urang kajadian, tina Kudrat, Iradat, Ilmu jeung Hayat, Sama, Basar, Kalam Pangeran anu tumiba ka lahir, nya pangeusina ieu alam tea, nu embung balik ka swarga, nu ceuk sajarah ambia mah, geus tetep tumetep batan betah di dunya, tegesna sagarana urang nu goreng mah anging tetep di Idajillanattulah..

S : Kumaha mun urang tea hayang kana " Inna Lilahi Wa Inna Lilahi Ro'jiun, tuluy bae solat, nya-eta tobat ngalebur dosa, supaya meunang ganjaran.

D : Naha rayi geus bisa solat ?

S : Kantenan bae samalah taya kendatna unggal waktosna oge rayi mah tara teu nyumponan.

D : Saha rayi nu solatna ? Rayi atawa Jirim jeung Jisim ? Cing mangga atuh lenyepan, geuning urang sajeroning Solat, Jirim jeung Jisim mah sakitu madepna ka Pangeran ari urangna mah, geuning jongjon utrak-atrok, luas-leos kana barang dunya, ka sawah ka panglalajoan, ka barang alus, mun lalaki sok leos ka nu luis, mun awewe sok leos ka nu kasep. Lebah dieu saha nu rek meunang ganjaran Rayi atawa Jirim jeung Jisim ? meureun sifat ganjaran teh bagiannana nu solat , ari bagian nu utrak-atrok mah nya tetep kadunyaan bae, anu matak rayi ulah ngaku geus bisa solat ka Pangeran, ari masih kangen kana sifat lahiriah, alias sok utrak-atrok keneh bae mah, anggur mangga turutan diajar rasa rumasa tumarima sakjeroning solat, kana kamurahan Pangeran, nu teu aya wates wangenan, jeung deui turutan salamina ulah ngan dijero keur sambeang bae tobat ka Pangeran teh mangga diajar eling salamina, tumamprak lir bakakak, eta ngaranna padikiran hirup, tegesna langgeng eling ka Pangeran, lain dikir nu rebuan, ngintip asup kaluarna napas, da sadaya manusa ge pada nyaho yen "La illah ha illaloh", teh hartina : euweuh deui anu aya anging Allah, ulah dihantem dibaca dibarengan jeung kaluar asupna napas bae, ulah puguh geus lieur ku dikir nepi ka lengna teu eling, hayoh ngaku. Napi Isbat , akrob jeung sagaraning Hayat, sarta lamun geus nyaho mah yen teu aya deui anu aya anging Allah, geura gede rasa rumasa sing husu geusan nganuhunkeun kana Roman-Rohim Anjeunna. Tah rayi pantesna urang disebut sagirna Idajil teh da bongan beurang peuting anging sifat dunya anu dipiiman teh, lain sifat anu langgeng , teges anu henteu ka purba ku dajal atawa dat nu keuna ku ajal. Lahiriah nu di pupundi , eta nu jadi muridna Idajil, anu ngagem, jimat cai nirmala, teges bakal langgeng hirup di dunya sipat-sipatna nu gunta-ganti ari rasana mah ka purba ku inten ratna dumilah, sawarga naraka aya di dunya, numatak ayeuna sok jadi cita-cita jeung pangimpian urang, ngeunteung nyawang ka inten dumilah, nilik-nilik pigeusaneun ngancik, nyawang pigeusaneun mulang, nerangkeun eusining sawarga, widadari 40, apel, anggur jeung papaesna permata, beurang peuting neneda kanu Kawasa mun dina mulang hayang ka dinya.

Uruy ku widadari lintuh,

hayang ku widadari lenjang,

bogoh ku widadari montok,

sono ku widadari denok.

Barang dahar henteu kalawan didahar sagala geus seubeuh manten. Aduh tobat rayi tetela eta mah barang nu anyar, pang bibita Idajil, ngarah anut manut ka manehna, eusina inten dumilah atuh da puguh di dunya ngan ka-ni'matan dunya bae nu ka tembong , lain ni'mat nu sajati, tetela ni'mat pulasan. Ari kana Hidayatna Allah Ta Allah anu aya dina diri mah kaluli-luli, henteu ngarasakeun rasa sapa'at nu aya dina dirina, keukeuh pateukeuh kabengbat ku rasa pulasan eusining inten dumilah, anu matak rayi, geuning perlambangna para Ambia, yen malaikat Idajil teh ayana di dunya sakitu betahna, nepikeun ka dipapagkeun ku para malaikat Jabrail, Mikail, Isrofil, Ijrail, keukeuh bae mugen, teu daek mulang ka Asal. Kapan Sawarga teh sagaraning rasa-rasa Kani'matan, sedeng Alam Dunya mah kapan alam pangabuian nurut alam nu bingung, sakabeh pangeusina kaancikan sifat susah. Tapi naha sakadang Idajil teu kersaeun mulih ? Tah eta rayi mangga lenyepan. Hartina : urang hirup di lahir ulah nepi keun katarik ku pangawasa dunya, nepi ka tibelat sieun ku maot, padahal jasmani mah paeh siga hirup soteh meureun bae eta sipat paeh kapanjingan sipat Hirup saperti sare, kade atuh gundam , ari rupa manusa tapi laku lampah jiga Idajil ! Nepi ka embung mulang ka Asal, atuh sulaya tina tangtungan elmu. "Hirup nuhun, paeh rampes". Komo lamun urang salawasna mikahayang sifat-sifat kadunyan , sanajan luhung elmuna, jembar pangabisana, tangtu sasarannana teh moal terang ka Allahan. Sakaratna hese, da melang ku dunya, kahayangna mah mobil, sawah ge hayang dibawa, teu ngingetkeun gubragna ka dunya teh teu mamawa nanaon. Tah nu matak urangna teh, sagirna tina Idajil tea.

S : Ngan eta nu diibaratkeun para malaikat opat nu mapagkeun tina naon nyatana ?

D : Eta nu di ibaratkeun malaekat opat nya eta, Hyan, Samian, Basiran, Mutakaliman, nu matak ku ahli elmu mah disebut :

Ijrail ibaratna sagarana hirup

Minkail ibaratna sagarana rungu

Isropil ibaratna sagarana tingal

Jabrail ibaratna sagarana ngandika

Mencarna ka Lahir, sumeren ka para Rasul

Adam ibarat hirupna

Enoh ibarat danguna

Ibrahim ibarat tingalina

Musa ibarat pangandikana

Isa Rohna eta pangawasa nu 4, jeung

Muhammad eta haqna atawa Rasana

S : Eta rayi mah masih kaliru keneh, naha Hayat teh dina napas urang ?

Sama teh dina denge urang ?

Basar teh dina awas urang ?

Kalam teh dina omong urang ?

D : Ih Hayat, Sama , Basar, Kalam, nu ti Nur Muhammad mah lain hirup napas, lain denge ceuli, lain awas panon, lain omong sungut; rayi kade palebah dieu kaliru, karana upami salah paham, engkena tangtu sulaya miguru kana adegan salira ku anjeun, kapan loba paguron, anu nitah tauhid solat, supaya nyipta rupa sorangan gawena sok mindeng ngeunteung, nilik diri nyawang badan, terus dicipta sajeroning solat, karana cenah engke dimana urang rek sah ti dunya, nu baris mapagkeun teh kudu nu jiga rupa urang, tah eta rayi asup kana golongan elmu Ingsun, mangkade nyimpang kadinya . . . . . . . .

S : Yaktos satadina rayi ge kitu tujuan kana seuhna teh.

D : Kiyeu rayi,

• Tina Kudrat upamana  jadi panon
• Tina Iradat nya kadaekna panon, nyaeta ngawaskeun,
• Tina Elmu nyaeta sanggeusna awas, tegesna kanyaho awas, nya kadaekna pangawasa panon.
• Kanyaho omong nya kadaekna pangawasana sungut
• Kanyaho denge nya kadaekna pangawasana ceuli
• Kanyaho hirup nya kadaekna pangawasana napas.

Ari ti Nur Muhammad kapan ti Rasa lain ti sara; nya-eta :

• hirupna perasaan
• dengena perasaan
• tenjona perasaan
• omongna perasaan

Saperti kieu : Panon urang kahiji nu musapir, sanggeusna awas, rey perasaan urang awas, yen nu musapir teh tangtu jelema melarat, mindeng tinemon jeung lapar, ari lapar tea kapan karasa nya ku rasa, geuning sakitu teu ngeunahna, terus urang hayang mere, tah eta rayi awasna sifat basar mah.
Tapi rayi, upamana rasa urang geus awas yen eta nu musapir mindeng tinemu jeung lapar, rasa urang geus ngomong yen urang lamun aya, sawajibna kana mere, tapi urang keukeuh teu daek mere, boga rasa kana lebar , eta tacan hirup rasana, ari kuduna jeung nyipat ka Pangeran tegesna jeung welas asihna, tah nu kitu kakara disebutna: Hirup, Ngadenge, Nenjo, Ngomong, oge sarua jeung Urang teh kasorotan ku Nur Muhammad nincak kana tahapan luhungna budi.

S : Tadi kasauran akang nyebatkeun yen urang sagirna Idajil, anu asup kana golongan setan ngancik di lahir embung dipapag ku nu diibaratkeun malekat opat , tah lamun urangna hayang mulang ka Asal tegesna daek dipapag ku sipat nu opat kudu kumaha urang migawena ?

D : Kieu rayi eta mah, mimitina kudu ku perasaan , tapi kudu ku jalan budi jeung ku pangarti, sabab ku jalan pangarti wungkul mah lapur, hamo bisa katekan , tanwande ngawujud ka sareatan , ana pana teuing sok nimbulkeun kahawekan. Sanggeus hirup rasa urang, tuluy praktek . Sareatna, kudu ngajauhkeun kalakuan goreng, nyalindung kanu hade. Hakekatna, sumembahna kana Wujud Nu Suci, jeung manut ka Rasa Nu Sejati. Tarekatna, milampah Welas jeung Asih ku jalan ngahajatkeun Kudrat , Iradat, Ilmu urang, guna, Ngahirupkeun nu paeh Rasana , nya-eta nu rasana tumungkul ka sifat dunya pek sina mangeran ka Allah.

Ngadengekeun nu torek, nya-eta nu rasana wungkul ngadenge kana sifat-sifat kadunyaan sina ngadengekeun ka Allah an.

Nenjokeun nu lolong, nya-eta nu rasana ngan wungkul awas ka sifat-sifat lahirian (kadunyaan) sina nganyahokeun ka Allahan.

Ngomongkeun anu pireu,nya-eta nu rasana ngan wungkul  dipake ngomong kadunyaan sina ngomongkeun ka Allahan.

Geura tungtun supaya rasa-rasana nyungsi kana kasucian muru kana arah ka Allahan nya segarana kasampurnaan tea.

M a r i p a t n a engke dimana kalakuan urang geus ngawujud, tegesna geus aya dina bagian suci.

Demi samangsa-mangsa geus suci, tangtu engkena tunggal deui jeung Wujudna Nu Maha Suci.

S : Naha teu nganggo tirakat ?

D : Henteu rayi, ari elmu nu nganggo tirakat mah, kayaning puasa, ngetan,ngabeuti, ngalalab, mutih, matang puluh, nyenen kemis, etamah kaasup kana elmu tawajuh, elmu nu mi'iman kana kalimah, malah ngaku ge yen kalimah beunang nyumpahan guru mah Konci iman atawa suci, akang oge rada teu ngartos, henteu kaharti ku akal heunteu kapikir ku pikiran, naha Allah teh budak kitu ? Bet beunang ditukeran ku kalimah beunang nirakatan, mun panto tea mah, jol kalimah beunang tirakat, gancang bae ku Allah teh dibuka, duka atuh rayi leresan eta mah, ngan ceuk akang mah tetep pamohalan, cita-cita (bijgeloofd egoisme wungkul). Allah mohal beunang diolo ku jampe, sing boga pikiran bae atuh da rayi teh geus akir baleg (geus aya Ingsunan).

Urusan tirakat eta mah berhubung jeung ka-majajian, lain ka-hakekian, ulah boga rasa yen lamun majaji disiksa, hakekina tembong, kapan ari hayang salamet, badan kudu cageur jeung laku kudu bageur, supaya elingan sehat, aya oge nu katimbang ku akal, kasurti ku pikiran anu sehat, urusan tirakat mah pondamentna kana nguatkeun kahayang ( wil versterking ), tapi kahayang oge nya tangtu kana sifat lahir bae, tetep bagian ka Allahan mah teu beunang dihontal ku jampe (sugestie) jeung teu beunang ditirakatan ku macem kumaha oge.

Jeung deui rayi, mangga aos riwayat bangsa proffesor nu ngudag sifat lahir (materialisme) oge dina enggoning nguatkeun kahayang supaya laksana, dina tirakatna teh lain dihaja ngan estunku fanana bae, nepi kana dahar kana sare kaluli-luli.

S : Jadi tetep bagian ngudag ka arah ka Allahan mah teu meunang tirakat ?

D : Ari akang nyebatkeun tetep teu meunang mah henteu, kapan salira rayi oge kagungan timbangan ku anjeun, ngan bae mangga manahan, urang upami nyungsi rasa sejati mah, rasa urang atuh ulah disiksa  tegesna lamun urang nyungsi nu ngeunah, ulah diteangan di nu teu ngeunah.

Mun neangan Gula, kudu diteangan amis, ulah diteangan dina haseum, atuh nya tangtu sulaya sifat sulaya rasa. Tah mangkade rayi nyimpang kadinya puguh jeung cuka hayoh diaku jeung gula, keur sulaya pamanggih teh tambah kaancikan reueus, umangkeuh, terus boga panyakit ngewaan ka nu teu saikhwan, ngufur ngafir ka nu sejen, teu rumangsa ageman sorangan oge nyaliwang, mun ngajungjung Betawi tea mah, hayoh Ciwidey anu diaku, disurup-surup direka-reka, keukeuh piteukeuh dibelaan kurang dahar kurang sare kudu disebut Betawi, paharus-harus catur, pabisa-bisa carita, katurug-turug enggon-enggoning umaku teh, ari kalakuan mah sok nirca keneh.

Jeung deui rayi anu matak di urang mencar rupa-rupa elmu teh, ku majuna pangarti, nyusul saur ngudag basa, hayang tambleg hayang sidik, ka Allah ka Rasullulah, ngan rajeun oge nu kaliru milarina, bet kana bagian Kudrat, Iradat, Ilmu, nyungsi bibitna ka-sareatan, usul-asal nu gelar tina cahaya. Geura ku akang urang terangkeun, anu patali jeung cahaya opat nu rupana beureum, koneng, bodas, hideung tea ageman nu dianggap Allah ku nu ngaku nyekel jeung batin-batinna anu percaya.

B e u r e u m = ceuli = bayah
mi-Allahna ka Rohaniah (Getih)
Anggapannana hirup teh getih karena lamun euweuh getihan mah maot.

K o n e n g = jajantung = napas
mi-Allahna kana Napas (mutmainah)
Anggapannana hirup teh napas karana lamun euweuh napas mah maot, nganggap sagirna napas, kabirna suwung.

B o d a s = ati = mata
mi-Allahna kana sir
Anggapannana indung lanjang bapa bujang, urang geus aya dina asal enggeus ngancik dina awit nya eta alam sir tea.

H i d e u n g = hamperu = sungut
mi-Allahna nya ka Isun atawa ya Allah ya Isun

Gumulungna nu opat mi-Allah kana elingan. Sagirna elingan, kabirna Allam.

Tah rayi sakitu lobana nu dianggap Allah ku sabagian elmu tarekat tapi kabeh oge bagian blok opat bae, mana nepi ka ayeuna teu eureun-eureun ngadukeun harti, ari harti tea nya asal tina pangarti, ari pangarti tea kapan teu aya watesna unggal bulan beuki tambah, ari rasa dirina mah kaluli-luli,  teu nyahoeun yen nyungsi kasucian mah teu beunang diberik ku pangarti diudag ku pangabisa wungkul.

S : Ayeuna rayi parantos ngartos, ngan teu acan paham bener, gampil engke tumaros deui bae upami aya nu hilap mah ngan rayi bade tumaros kahamhaman rasa.

D : Ham-ham kumaha ?

S : Ham-ham pang akang tiasa nerangkeun kitu, mana katerangannana ?

D : Euh rayi teh naroskeun katerangan, eta rayi ayeuna carios papayun-payun sareng saha ?

S : Ari nyarios papayun-payun mah sareng akang.

D : Tah geuning, kapan katerangan mah akang nu nerangkeun.

S : Sumuhun akang nu nerangkeun tea mah namung kenging ti mana ?

D : Ari timana-mana mah tegesna asalna pamanggih akang, rayi teu aya hak kana uninga, kapan eta mah hak akang pribadi.

S : Yaktos ari hak akang tea mah, ngan kumargi akang purun ngajawab patarosan abdi, jadi abdi aya hak kana naros kauningaan akang, kenging nyutat tina naon, lamun kitab, kitab mana ?

D : Euh jadi rayi teh hayang katerangan sareng saksi kitab ?

S : Sumuhun.

D : Lamun rayi hayang katerangan sareng saksi kitab, atuh taroskeun bae kana kitab, entong ka akang.

S : Engke heulaan kang abdi lieur, kapan ieu teh urusan agama, sedeng jaman ayeuna mah kedah tiasa milih nu sah.

D : Hal urusan sah henteuna eta urusan kitab, sanes urusan akang, ngan sing emut bae, naha rayi nu nge-sahkeun kitab ? atawa kitab nu ngesahkeun rayi ?

S : Parantos bae, rayi ngartos kana maksud akang.

D : Nuhun atuh ? ? ? ! ! !

S : Aeh ketang kang sakalian bae, abdi teh nembe emut aya keneh kapanasaran tumaros geusan kahusuan agama abdi.

D : Na rayi teh hayang husu kumaha.

S : Hayang husus kana solat, supaya entong sok utrak-atrok.

D : Eh hayang bisa  babarengan sareng jirim sareng jisim ?

S : Sumuhun.

D : Ari maksud rayi nu disebut solat teh naon ?

S : Sumembah ka Maha Suci.

D : Geus bisa rayi sumembahna ?

S : Nya-eta kapan ku akang disebatkeun utrak-atrok, sulaya tina adegan sembah, rayi mah cindekna teu acan tiasa, tah ku margi teu acan tiasa, ayeuna kedah kumaha supados tiasa tauhid.

D : Samemeh akang nerangkeun patauhidan solat, rayi kedah ngartos heula, kana wincikannana, naon nu matak urang sok ngalakonan waktu, sembahyang di saban-saban mangsana.

S : Ari emutan rayi mah kalawan gelarna agama disebat pagawean.

D : Tah yaktos pisan rayi disebatna pagawean, tah urang teh rek ngagugulung pagawean atawa arek digawe.

S : Kapan eta oge digawe ku kalimahna kalawan prak nangtung, lungguh, ruku, sujud, jeung paneda anu nyumponan cara-carana.

D : Ngaugkeun digawe, cing ku akang urang wincik mangga ku rayi jawab patarosan akang. Mimiti nu diaos ku rayi naon ?

S : Adan, Muji ka Allah nu sifat Akbar.

D : Naon rayi hartina Akbar ?

S : Agung, jadi teu aya deui nu agung salian ti Maha Suci.

D : Rayi parantos terang kalawan percayana yen Allah teh Agung ?

S : Kantenan rayi terang kalawan percanten 100 % yen Maha Suci teh kalintang agungna.

D : Tah geuning rayi parantos terang kalawan percaya mah parantos bae tong di omomg-omong keun diapalkeun unggal solat, da puguh Maha Suci mah geus tetela agungna, jembarna, kawasana, geus teu kedah deui di puja-puji da sadaya puji oge kagungannana, urang oge kapan usik malik pupujian oge ku pangawasa Anjeunna keneh, tah parantos kitu ngaos naon, tapi ulah salah paham, lain akang nyarek make kalimah eta, ngan gera prak kalimah anu diucapkeun ku rayi teh geura lampahkeun !

S : Parantos kitu urang ngaos yen teu aya deui anu disembah anging Allah . . . . . . . . .

D : Parantos terang ayeuna rayi yen nu wajib disembah anging Allah, atuh geura prak, sagala ulah tuturut munding, ari prak mah teu acan keneh, ceuk rayi taya deui nu wajib disembah anging Allah, kumaha eta rayi parantos nyembah ka Allah ?

S : Numawi rayi kacida lieurna sugan teh sumembah ka Allah teh biasa bae ku omongan jeung pupujian.

D : Enya rayi kapan eta mah ngan ngabejaan, tegesna nitah soteh kana prakna lain nitah ngalelewe, eta pang pentingna (voornaamste) kalimahna naon ?

S : Alfatihah, sabab teu aya deui kalimah anu pang pentingna lian ti fatihah.

D : Naon Sundana ? Atawa surahna ?

S : Ari maksudna mah urang teh nyuhunkeun kanu Maha Suci, supados ditungtun kana jalan nu lempeng sarta suci, ulah ka jalan nu sasar sarta masiat.

D : Jadi rayi teh nyuhunkeun ditungtun kana jalan lempeng ulah nu sasar ?

S : Sumuhun.

D : Ari rayi geus terang jalan-jalanna ka sifat nu lempeng jeung nu sasar ?

S : Pamendak abdi mah, jalan nu lempeng tangtos ka sifat kabeneran atawa kahadean, nu sasar tangtu kana kagorengan.

D : Tah geuning rayi geus ngartos, anu sasar anu lempeng, tegesna sasar lempeng geus aya di rayi ngan kantun urang nu milihna tegesna nya ngalakukeun, naha atuh rayi, unggal waktos menta ditungtun, kapan hade goreng geus aya di rayi.

S : Eta bae supados tiasa ngambah jalan anu lempeng tea, numawi mindeng nyuhunkeun oge.

D : Naha kira-kira lamun rayi hantem nyuhunkeun ditungtun kana jalan nu lempeng, tapi kalakuan rayi ngadatkeun kalakuan goreng naha tiasa dijabah ?

S : Nu tangtos moal.

D : Tah geuning rayi ngartos, kiyeu rayi kapan Allah ta Allah mah geus kun payakun, hade goreng geus aya di urang ngan urang nu kudu boga kanyaho (Elmu) anu matak kudu bisa ngelmu oge, nya-eta pigeusanneun milih-milihna, elmu nu dipake tahapan pakeun nincak jalan hade, kalawan prak nunda gorengna.

S : Sumuhun nu gorengna urang tobatan.

D : Tobat ka saha rayi ?

S : Nya kanu Maha Suci.

D : Naha da Allah mah moal ngaganjar moal deuk nyiksa, ari tobat mah rayi kudu ka diri sorangan , tegesna kudu eureunan kalakuan anu karasa goreng, sabab anu ngaganjar jeung nyiksa mah buah-buahna kalakuan urang keneh bae.

S : Parantos bae kang tong diputer-puter abdi lieur menta nu jelas bae, ari sumembah ka nu Maha Suci kumaha ?

D : Kieu rayi, ari sumembah ka Maha Suci mah teu kenging ku lisan bae, tapi kedah prak, kalakuan urang wujudkeun nu sifat suci, tobatna nunda kalakuan nu goreng anu geus kasorang ulah deui-deui dipilampah, malah geuning talari sepuh-sepuh mah kudu korban meuncit sipat bangsa hewan sarta urang teu meunang ngakan deui dagingna , eta hartosna sifat-sifat ka hewanan nu aya dina kalakuan urang kudu di peuncit, tegesna sina paeh atawa leungit, sarta urang ulah ngakan deui dagingna, hartosna ulah ngicip-ngicip deui, sarta ceunah ceuk kasauran mah unggal Mulud kudu indit neukteuk buntut ka Cirebon hartina sing inget urang ngarereb di dunya keuna basa owah gingsir, bisi poho sang hewan buntutan deui tegesna ulah nyorang deui, kalakuan anu goreng geura teukteuk, mukedaskeun dina wedal Kanjeng Nabi, tegesna kalawan Rasa Sejati, nu aya dina balumbang timurna Rasa Caang sing cara somorot bulan tanggal 12 Mulud, tah rayi kakara solat eta mah sumembah kalawan husu, Iman, Tauhidna, Marifatna kalawan Islamna, gumulung ngajadi hiji, nyungsi bibit kasucian, ngudag arah ka Allahan, moal keuna ku hama haram jeung batal da eling salamina.

S : Jadi teges ari ngaran-ngaraning sumembah mah kudu kalawan prakna tegesna kalakuan ?

D : Enya rayi, mun jelema keur resep di sifat goreng , sarta sabalikna mun keur milampah kahadean, hartina keur sumembah kana wujud Suci. Tapi lebah dieu rayi kade kaliru ku kasareatan, loba jalma nu ibadahna getol, tapi kalakuannana sulaya tina sembahna tegesna tekad ucap lampahna paaing-aingan, jajauheun kana bener nu kitu jalma kafiran, tapi tetep ari martabatna mah kolom kasasar, kasasar oge lain kasasar karampa, tapi sasar teu boga ageman ceuk basa arab mah ba'id.

S : Tapi kumaha urang dina cara-cara umum, kapan dina lumbrahna pada kaula mah ibadah teh loba nu ngan semet lisan.

D : Naha rayi tergantung ka lumbrah, eta urang boga rumasa tekad sumembah ka Maha Suci, lain tergantung ka rayi persoonlijk ?

S : Ari patekadan mah tergantung ka persoonlijk ngan eta bae kumaha keur lumbrah ?

D : Naha rayi milu ambil pusing ka lumbrah nu salah, nu sarare keneh teges tacan hudang ka bagian ka Allahan , tapi rayi sorangan geus beunta, teges geus awas ka nu di maksud, naha rayi rek sare deui bae ? atawa terus berjalan.

S : Eta bae panginten ari teu nyumponan kasare'atan mah, jadi omong pada kaula.

D : Euh rayi, ari jadi omong mah tangtu, da kaayaan nu kitu pagaweanana manusa, goreng ku gorengna, hade ku hadena teu weleh jadi tutur catur, buah carita, goreng dipojok hade dipojok, mana palebah dinya kuatkeun Iman urang, sing bisa tirakat ngetan, lain ngetan ngakan ketan, atuh eta mah matak mejen, tapi siloka ngetan hartina sing kuat ku kapanas hate, tapi umum oge ari beunang mah geura tungtun bae, pecak-pecak elmu urang geura tembongkeun ibarat konci, pecak asupkeun, tapi lamun sakira sereg mah entong dipaksa , temahna matak rujad duduluran, sing emut ka saurna Dewa Brahma ka Sidarta Kapilawastu nyebutkeun kana tujuan Buda Sidarta, yen lamun kabeh manusa cara manehna, tangtu alam dunya moal rame, sarta kumaha jawab Sidarta ? Kuring teu rek ngomean nu embung, tapi arek soteh ngomean nu daek kalawan anu geus hirup akal pikirannana katut perasaannana.

S : Ayeuna rayi geus teu aya kapanasaran deui, ngan kantun tumaros saha ari Guru mursid, nu aya di badan urang.

D : Ari nuduhkeun mah akang teu bisa, da sa-enyana akang oge susah, ka ngaranan boga Guru mah kudu geus bisa guguru.

S : Sawios asal rayi ngartos bae, keun bae guguruna mah malah mandar saeutik-eutikeun tiasa.

D : Kiyeu rayi, ari sa-enyana guru mursid mah taya lian anging sifatna Allah, sabab ngan sifatna Allah anu bisa akrob jeung Allah jeung Rasullulan teges bisa lumebet lahirna ka Baetullah, batinna Baetal ma'mur.

S : Sifat nu mana tea ?

D : Nya-eta Kudrat, Iradat, Ilmu, Hayat, Sama, Basar, Kalam atawa Sara jeung Rasa, atawa Rahman jeung Rahim, atawa Jirim jeung Jisim, jadi kanyataannana mah nya ieu, Muhammad Majaji jeung Muhammad Hakeki. Lahirna urang diajar ku majaji kalawan pangawasa Pangeran, urang jadi loba kanyaho, guna pangartina; batinna diajar ku hakeki kalawan Kudrat, Iradat Pangeran, urang jadi boga perasaan guna kaluhuran budi.

S : Cing pasihan ibarat ku isarah supados rayi jelas ngartina.

D : Kiyeu rayi, hiji ewe salaki, upama ngumbara ka negri Walanda, diditu cunduk ka waktu ninggang ka mangsa eta jelema teh boga anak, anakna rayi geus tangtu adat tabeat kalawan basana nu ilahar dipake didinya, malah kadaharannana oge tangtu kadaharan nu aya didinya, tah ku rarasaan eta budak mah manehna teh bibit urang Walanda, kabetahan karasa taya wates wangena. Tapi sanggeusna akir baleg sarta geus boga kanyaho, manehna kakara ngarti yen manehna teh asal urang tanah Jawa, ngajuru salebet ngumbara ayeuna eta budak salin perasaan, keukeuh cumantel hayang bisa mulih ka Jati mulang ka Asal tegesna hayang bisa balik ka nu diibaratkeun tanah Jawa tea.

Tah ku margi eta, ku ka mistian mah anu baris ditanya ku eta budak teh, teu aya deui anging Indung Bapana, da ngan eta nu wajib dicukcrukna , ngan eta nu jadi Guru Mursidna, urang ge nya kitu geura kanyahokeun bae "Rohmani Rohim" da eta nu asal tina Datna Gusti. Ngan ayeuna etang-etang panutup carita akang, gampil kapayun urang teraskeun deui . . . . . . . . . .

Ibarat cai, ku kaayaan geus jadi ijs (es), upama disidikeun es teh bet cai wungkul, kitu deui badan urang, upama di sidik-sidik mah  Jas-mani teh Rohmanian, Roh-himna berguna keur ngarasakeunnana . . . . .

Atuh ayeuna mah ibarat keur jadi es, ulah resep dibungkus ku tai ragaajian bae, jeung ulah ngahayoh neangan raga-jieun bae bisi urangna (es teh caina ngahiji jeung RAGA-JIEUN). Hartina mah sukma rayi ulah akrob jeung raga-jieun (stoffen), tapi samistina upami rayi palay ngahiji sareng Allah nyalindung bae atuh ti ayeuna keneh kana wujud anu sarae, moal salah deui lugayna jasmani teh ROHMANIROHIM  (sifat nu nyipatan) ka rayi bakal kana Dat-na deui . . . . . Es nyalindung ka cai, leungit es jadi deui cai . . . . TA'UDZ atuh, anu tangtu bakal aya di-nu di-salindungan . . . . . .