Gunung jiga anu ngariung, pasir jiga nu diukir, ngayuh semu ka nu wuyung, narik resmi nu prihatin, kagagas ku hawa alam, langit lenglang taya nu ngahalang-halang, sinar layung mani hibar, hurung ka unggal lulurung, malah hegar kana pikir, gumebyar lir sutra jingga, lir kaya direngga-rengga, ngahiliwir angin leutik, nebak kana kekembangan nu keur meujeuhna ceuyah beukah, munggah ngadalingding, siga katur ku panglipur, siga bakti panglelejar, mintonkeun wawangen alam, ciri wanci nu sajati, ciciren sifat nu tulen, pangaruh anu keur ngayuh , nyembah maunat mujijat, dina hiji lamping nu lempeng, di tutugan suku gunung Banjar Panemon, aya hiji bumi resi, aturan nu magelaran, jiga karang pangtapaan, panglungguhan anu husu, pangcalikan nu semedi, anteng sifat ka eling, nyusul panemu rahayu, ngudag babaran waluya, ngimeutan kasalametan, muji ka jatina diri, muja kanyataan rasa, nyifat tunggaling kawula jeung anu kagungan sifat, nyata ngudag tunggaling kawula Gusti, geus husu mareuman napsu, iklas nilar kawiwitan, teu ti belat ku duriat teu katarik ku nu luis, iklas sagala-galana, geus teu tolih kana sifat napsu dunya, wungkul tohid ka yang Sukma, ngaraoskeun gumelar dina "panalar" heunteu daya upaya. Saha nu kitu teh ?
Eh, geuning pangeusina bumi eta, nu di lamping suku gunung Banjar Panemon, jenengan Raden Kamil, nu harita nuju ngalantung dina lulurung, kairut ku waktu alus, kapelet ku poe hade, kabengbat ku paningal kana sugri kekembangan nu tumuwuh didinya, lir basa dipatamanan, pamipitan para ipri, pangulinan para dewa, ngabarak kembang ermawar pacampur jeung sumarsana, Raden Kamil ngahuleng, kagagas ku kawaasan, ras ka diri nu keur nyungsi, ras ka badan nu keur ngudag jatining kasampurnaan, teu weleh maca Alhamdulilah muji ka Rohman-rohimna Pangeran.
Kaayaan kitu teu sabaraha lami, waktos anu ngajurung undur, burit nu ngajakan balik, geus meujeuhna wanci magrib, lajeng angkat ka tajug, di tengah empang ayana.
Henteu dinyanaan yen harita aya tamu, rayina ti kota jenengan Raden Kamal, nya lajeng bae raka rayi sembahyang di tajug. Sabada sembahyang lajeng lalinggih di tengah bumi paduduaan bari ngaleueut lalawuh candak ti kota. Rakana lajeng ngawitan tumaros :
Akang teu kinten atohna disumpingan salira ayi kumaha damang ?
Kamal : aya pangesto teu kirang sawios-wios, sareng pangdongkap rayi kadieu, kahiji : sono lawas teu tepang, kadua : ku hayang mudakarah ilmu, geusan bawaeun bekel nyungsi kasampurnaan.
Kamil : nuhun pisan kitu mah ayi, ciri manusa anu sah kamanusaannana, kudu kersa ngamudakarahkeun pamendak, naon tea anu ku ayi ngawitan deuk ditaroskeun ?
Kamal : bade tumaros: ari agama teh naon ? sareng mana rayi anu rada ewed, ceuk kaum ahrul sara: biasa bae nya-eta aturan-aturan anu dikudukeun ku kitab-kitab; demi ceuk ahrul Haq: eta mah lain agama tapi drigama, ari agama mah nya-eta elmu panyungsi diri pakeun jalan kasampurnaan.
Kamil : pamendak ahrul Sara bener, pamendak ahrul Haq bener. Ngan ari pamendak akang mah kieu : Agama teh asalna tina kecap Adin, hartina: "peraturan" tapi naha rayi rek ngagugulung peraturan bae, atawa rek terus ngaturna, tah dina ngaturna mah, tegesna peraturan teh kudu dipigawe, ku aturan eta urang tangtu boga kapercayaan, tegesna tarekatna Agama = nya kapercayaan; sanggeus urang boga kapercayaan nya tangtu urang boga cecekelan atawa ageman, tah haqna agama teh ageman, kantun ngawujudkeun patekadan urang kalawan prak kana ngalakukeun kabeneran, tah dimana geus ngawujud eta ma'ripatna agama, tegesna geus Suci tea atawa geus Islam tea.
Kamal : ari agama naon gunana ?
Kamil : lahirna supaya dunya beres sarta batinna supaya manusa bisa sampurna mulih ka jati mulang ka asal nyumponan dalil : Inna lillahi wa inna illahi rojiun.
Kamal : naha lahir tergantung ka batin ?
Kamil : Duanana sami, ngan panuhun akang, rayi ulah tumaros urusan lahir heulaanan, enya akang aya dina lahir tea mah, mung engke deui eta mah.
Kamal : naon ari lahir sareng naon ari batin ?
Kamil : lahir sifat nu kasar nu katingal ku panon kapala, demi batin nya-eta sifat nu gaib; anu aya tapi euweuh; anu euweuh tapi aya; karasa sareng katingal ku awasna perelmuan.
Kamal : Naha sanes ku panon Qolbi ?
Kamil : Upami rayi ningal barang Qodim tegesna gaib ku panon Qolbi, eta sanes anu saleresna, amung ku ciciptan bae, da panon Qolbi mah tergantung ka panon lahir, awasna qolbi nurutkeun awasna panon, geura mangga awasna qolbi ayi ayeuna awaskeun ka Mekkah tangtos kana teu awasna da urang acan jarah ka ditu.
Kamal : kantenan bae moal katingal mah da awas qolbi mah tegesna awasna qodim kapan paranti ningal nu qodim tegesna nu maha Suci, anu ceuk dalilna Ru'yatulahi ta'ala fie dunya biaenil qolbi.
Kamil : urusan dalil ru'yat enya henteuna eta tergantung ka pamanggih pangarangna, ngan mangga akal pikiran ayi geura bukakeun sina hirup, ulah percaya kana pangreka jelema kapan ceuk tadi ulah taqlid, kudu karasa kudu kaharti, ru'yat qolbi salawasna tergantung ka pamanggih ru'yat panon, geura ayi eta tingal nu gumebyar beureum, tangtos ru'yat qolbi ayi guguru heula ka panon kapala, tegesna ari uninga yen beureum, meureun bae da geus terang rupa beureum, nyakitu deui anu koneng, bodas sareng hideung, geura mun ayi tacan uninga sifat di lahir, kapan ka barang nu diaku ku ayi qodim moal tiasa ngareka rupana; mangga ayi nyandak jalmi lolong, tapi ulah nu lolong anyar; kedah nu lolong ti barang gubrag ka dunya, cik pek mangga titah tajali atawa tarekat, naha qolbina tiasa awas sareng terang kana sifat-sifatna ?
Kamal : urusan ru'yat qolbi mangke ditaroskeun deui kana kapentingan agama.
Kamil : atuh ru'yatna perelmuan oge engke deui bae, da kedah berhubungan sareng ru'yat qolbi.
Kamal : mangga, jalaran urusan ru'yat jadi seuhna perelmuan, engke urang pandeurikeun, ayeuna rayi tumaros, aya saur kieu :
"Maraneh kudu mikir kana dadamelan Allah, tapi ulah mikir kana Zat Allah, lantaran maneh moal bisa ngukur watesna", (duka bener, duka henteu, dalilna kieu : Tafakkaru fie chalqilahi wal tatafakaru fa inna kum lan taqdiru qadrahu).
Kamil : sa teu acanna ngajawab, akang gaduh panuhun, mugi ulah naroskeun dalil, ari dalil mah kudu kana kitab bae; surahna, sundana, malayuna, walandana, Inggrisna didinya aya kabeh.
Kamal : ke heula kang, nu mawi abdi naroskeun dicampuran dalil ka akang, kapan saur akang peraturan teh kudu bisa jadi kapercayaan, lantaran kapercayaan anu berhubungan urusan ka Allahan aya 2 tingkat ceuk ahrul Sara : Tafakkaru fie chal qilahi wala tata fakaru fa inna kum lan takdiru qadrahu, tah dalil eta nu dikuatkeun, ari ku elmu Haq, dalil ieu nu dikuatkeun : Awalahu wajibin allal insanu ma'rifatulohitaala bistiqoni (awalu dini marifatulohi) eta mana anu leres ?
Kamil : Sara leres, Haq leres.
Kamal : har, ari leres duanana mah atuh rayi ewed, anu mana nu kudu dibantun, sugan kumaha timbangan akang ?
Kamil : akang teu tiasa nimbang da sanes tukang timbang.
Kamal : ari akang tara nimbang-nimbang urusan dalil mah, abdi moal naroskeun deui timbangan, ayeuna mah rek naroskeun pamendak akang, ngabantun leres nu mana ?
Kamil : ari naroskeun pamendak akang mah mangga, akang rek nyokot nu aya saksina.
Kamal : kapan eta dalil parantos kasaksi ku kitab-kitab.
Kamil : upami rayi ngabantun tina kitab, disaksian ku kitab, disahkeun ku kitab, meureun benerna ge bener kitab eta mah, mana ari bener keur urang, cing rayi atuh sing emut naha kitab nu neangan kasampurnaan teh? atawa salira ayi ?
Kamal : kantenan abdi, ngan ngabantun jalan-jalanna tina kitab.
Kamil : upami rayi ngabantun tina kitab sareng nu dianggap sah ku rayi tina kitab enggeus bae ulah sok nyarita jeung papada manusa, kitab bae ajak mudakarah, meureunan sagala aya, da mudakarah jeung manusa mah kudu terang elmuning manusa, eta kapan rayi kapungkur geus jadi mu'alim, kapan lain mu'alim buaya ......... geuning ari pangakuan mah kapan jadi "mu'alim manusa" , tapi kakara jadi mu'alim kitab, da ku dumeh tacan terang elmuning manusa tea, tapi ayeuna mah sugan geugeuy.
Kamal : parantos kang tong diputer-puter abdi lieur, nu dianggo saksi ku akang upami sanes tina hadis dalil atanapi kitab anu mana atuh ?
Kamil : anu jadi saksi-saksi pikeun ngaenyakeun perelmuan akang oge ku tilu rupa : hiji akal dua pikiran tilu perasaan.
Kamal : tah eta 2 urusan, nya-eta Sara jeung Haq pamanggih geusan nerangkeun kaayaan Allah, anu kasaksi ku saksi-saksi akang, abdi ayeuna hayang terang anu mana anu leres.
Kamil : jadi saksi rasa, akal jeung pikiran rayi ayeuna rek milu nyaksian ka nu geus kasaksi ku saksi-saksi akang tea ?
Kamal : Sumuhun ?
Kamil : urusan dalil tafakkaru nu dikuatkeun ku ahli Sara, eta oge bener, margi ngabantun saksi kitab, nya kitu deui dalil Awalu wjibin, eta oge bener da kasaksi ku kanyataan pamanggih manehna, kalawan kasaksi ku imanna keur waktu tajali, ayeuna nerangkeun elmuning akang nu kapanggih sarta kasaksi ku akang kana dadamelannana ku percaya jeung ma'rifat oge kudu, tapi papada ma'rifat oge lain ngajinis kasaksi ku pancadria urang mah, ngan ma'rifat ka ayana Allah ku awasna elmu tea, tadi kapan ku ayi urusan awas ulah waka diterangkeun, engke bae pandeuri lantaran penting teuing, tegesna meureun ayi seueur keneh ka panasaran geusan tumaros hal ilmi kabatinan ka akang, sareng akang bade tumaros reh rayi geus lampar pamendak, kenging oge disebatkeun gudangna elmu, sareng ceuk wartos ayi geus nyekel tarekat kawalian anu sajati, cing mangga pedarkeun ulah disumputkeun geuning da kitab oge nyarek, buktina aya saur kieu :
"Saha-saha nu ditanya tina hal elmu tapi manehna teu nerangkeun, tangtu manehna dina poe Qiamat dikadalian ku kadali seuneu". (Man su ila an ilmin fa katamhu uljima yaumal qiyamatibi lijamin min-naar?)
tah geuning sanajan kitab oge sakitu nyarekna ulah sok nyumputkeun kanyaho, sareng eta ayi katingal ngabantun wawacan sareng buku-buku cing mangga geura wejangkeun.
Kamal : Jalaran ieu kitab, upami diwejang hiji-hiji kacida lamina ayeuna urang candakan nu parentingna bae, lajeng urang munajarahkeun, nu katimbang sae urang bantun anu salah urang tunda, tapi boa raos rayi teu aya lepatna da sadayana nyata dina salira.
Kamil : kitu mangga atuh.
Kamal : ngawitan nerangkeun dalil : Man arofa nafsahu faqod arofa robahu, sareng Man arofa robahu, faqod jahilan nafsahu. Sundana : saha-saha nu nyaho ka dirina, tangtu nyaho ka Pangeranna, sareng Saha-saha nu geus nyaho ka Pangeranna tangtu dirina ngarasa bodo.
tah eta kang dalil pang pentingna anu matak urang kudu ma'rifat teh geura kanyahokeun jatining ingsun, tangtu engke ma'rifat ka Allah, sareng engke upami parantos marifat ka Allah, tangtos urang salamina ngaraos teu daya teu upaya usik malik anging ku pangawasa anjeuna anu ceuk dalilna deui : wahua ma akum aenama kuntum.
Kamil : Titadi akang parantos nerangkeun yen dalil mah urusan kitab jadi ayeuna akang kana dalilna mah teu rek pipilueun ngan akang sakadar rek nerangkeun dina surahanana bae nu ku rayi ayeuna didamel ageman. Saha-saha nu nyaho kana dirina, tangtu nyaho ka Pangeranna, tah eta bahasa Sunda nu eces nu nyata kalawan tetela, nerangkeun yen upami nyaho kana diri, tangtu nyaho ka Pangeran, awas rayi, ari diri teh lain urangna, lain Ingsunna, diri mah jirim jeung jisim, ceuk bahasa Walanda mah : stoffelijke lichaam en astraal lichaam, jadi tegesna upami rayi uninga yen "urangna" disifatan ku jirim sareng jisim (rohman-rohim) tangtu terang ka nu kagungan eta persifatan, nyatana nya Maha Suci tea.
Sanggeusna urang terang ka nu nyifat ka urang, kakara urang sing rumasa Lahaula tea, tah rayi nu Lahaula mah jatining ingsun tea.
Kamal : Sumuhun ngartos ayeuna, bet tebih sareng surahan nu sanes.
Kamil : Tong disebat nyurahkeun, akang mah teu patali jeung dalil ngan eta rayi ngartos atanapi henteu ?
Kamal : Ngartos, ..........
Tumaros deui dina ieu kitab ditulis, yen Kj Nabi Muhammad teu pupus, sabab lamun anjeunna pupus alam dunya oge moal aya, pupus soteh majajina nu Sumare di Madinah tapi Hakekina mah aya di urang, nu matak wajib dikanyahokeun.
Kamil : Jadi tegesna maksud eta kitab majajina aya di Mekkah, hakekina aya di urang ?
Kamal : Sumuhun kitu ...........
Kamil : Eta ku pikiran rayi kumaha ?
Kamal : Bubuhan abdi mah parantos tarekat jadi percanten bae kitu.
Kamil : Eta katimbang ku akal pikiran sehat ?
Kamal : Raraosan mah ku pikiran sehat da puguh geus nyata.
Kamil : Ari nyata-nyata kitu mangsa bodo rayi, ngan akang rek naros saeutik, ari akrobna Majaji jeung Hakekina dina naon ?
Kamal : Dina Wujud !
Kamil : Tah geuning ngartos, ayeuna akang naros deui, ari majaji ayi akrobna sareng hakeki ayi dimana ?
Kamal : nya dina wujud rayi.
Kamil : Nu tangtos dina wujud rayi, lajeng diasmaan Kamal.
Kamal : Sumuhun.
Kamil : Tah geuning kahartos, ayeuna piraku bisa jadi, majaji aya di tanah Mekkah, ari hakekina di Pulo Jawa, kapan majaji tara jauh ti hakekina, majaji ayi tunggal jeung hakeki ayi, piraku pipisahan, komo ieu nu lain-lainna deui, beda bangsa beda martabat, ceuk cohagna mah pamohalan aya majaji onta hakekina kuda, jeung deui ari elmu di urang enya oge make ngaran Muhammad majaji, Muhammad hakeki, enya make ngaran Muhammad tea mah, tapi ulah nyabit-nyabit ka Muhammad Kj. Nabi, ieu mah Muhammad lalandihan tukang elmu bae, tegesna teu patali jeung itu.
Kamal : Nuhun abdi diwartosan anu jelas, ayeuna rek naroskeun sifat anu 20 -- tapi moal ditata sahiji-sahiji, bilih ka bujeng wengi, bade dipecahan 4 bae. Nafsiah, Salbiah, Ma'ani, Ma'nawiah.
nafsiah nyatana napas
salbiah nyatana panon (heherangna)
ma'ani nyatana lelegok ceuli
ma'nawiah nyatana sungut,
eta kumaha sami sareng pamendak akang ?
Kamil : Ari ayi ku pecahan 4 dina sifat 20 teh ngawincik sifatna Allah ? Atawa ngawincik pancadria ayi ?
Kamal : Ari sifatna mah sifat Allah, mung bae kapan lamun milari Pangeran kaluar tina diri tangtos kasasar.
Kamil : Naha lamun ayi parantos terang kana napas, panon, ceuli, sungut, naha ayi parantos ngaraos panggih sareng Allah ?
Kamal : Kapan didinya ayana tarekat jati, saparantos terang sifat nu 4.
Kamil : Akang teu naroskeun gumulungna sifat nu 4 dina keur waktu tarekat, naros soteh sifat-sifatna, piraku aya sifat Allah dina ceuli, dina sungut, kapan sifat 20 mah kaayaan Allah 20 sifat, kapan ceuk tadi oge sifat 20 mah katerangan, tegesna katerangan geusan neangan Allah kudu make sifat 20, jeung deui lamun rayi ngawincik sifat nu 20 dina ceuli, mana atuh langgengna ?
Kamal : Dina Qodimna.
Kamil : Naon Qodimna teh ?
Kamal : Qodim napas angseu
Qodim ceuli denge
Qodim panon awas
Qodim sungut ucap,
anu matak didinya aya puji Qodim alal Qodim, hartina : Sumembah ka sifat Qodim mah kudu ku Qodim deui.
Kamil : Ke heula nyarion teh ulah waka uclag-aclog, akang mah naroskeun nu langgengna.
Kamal : Sumuhun nu langgeng mah sifat "Qodim".
Kamil : Upami rayi keukeuh mempertahankeun hal nu dianggap ku rayi qodim ayeuna sawios, ngan akang deuk naroskeun enggoning rayi nganggap sifat 20 aya dina salira, jalaran milari Pangeran ulah kaluar tina tangtungeun salira, naha pangraos ayi Allah teh aya dina salira ayi.
Kamal : Aya !
Kamil : Atuh aya di unggal jalmi mah seueur .
Kamal : Kang ulah lepat faham pang nyebatkeun aya Allah di badan, tegesna Allah angliputi urang kalawan Kudrat, Iradat, Ilmuna, jadi sategesna mah aya sifat hirup di urang.
Kamil : Naha henteu 20 hannana ngaliputan salira rayi, bet Qudrat, Iradat Ilmu wungkul ?
Kamal : Sadayana oge ngaliputan.
Kamil : Ari Kiamuhuta'alabinafsihina, saha nu ngadeg ku anjeun ?
Kamal : Allah !
Kamil : Ari rayi ngadeg ku anjeun ?
Kamal : Kantenan ti sabarang emut oge rayi geus kieu da buktina teu inget ka alam asal.
Kamil : Har, kumaha ari ayi, ari ngangken geus marifat ka Allah, tapi luak leok ka alam teu inget, ana kitu engke rayi ngangken ka Allah ka kaula-Na.
Kamal : Sumuhun raos rayi kalawan katerangan tina sifat 20 kaulana tea nu dianggap Pangeran, jalaran kapan dina seuhna perelmuan geusan nyungsi jatining rasa, sedeng kapan ceuk dalil oge, rasa isun ya rasa gusti (al insanu siri waana siruhu).
Kamil : Rayi, kapan akang parantos seseepan dina buku taudz nerangkeun yen sakadang isun mah sagirna tina idajil, sareng deui mungguh kaayaan isun sareng kaula tea teu kinten bentenna, ari isun mah nya nu parantos diterangkeun tea, ari kaula mah hiji titel (asmana) si ingsun anu geus kumawula, tapi kade rayi dina enggon-enggoning kumawula sing emut, sanes kumawula ka dunya, atuh eta mah kaulaning dunya, tapi kedah kumawula ka gusti kakara jadi kaulaning Gusti, sareng deui ari pecahan sipat 20 mah bagian Nfsiah, Salbiah, Maani, sareng Manawiah teu kenging disalang surupkeun kana napas, ceuli, sareng sungut, da eta mah wincikan Jasmani, da sifat Pangeran mah sifat Goib, jadi nu diwincik teh kedah goibna bae, kitu oge upami parantos af'al kana kaayaan goibna diri ulah ari diaku sifatna Pangeran mah, kudu ngaku soteh af'al kana sifat Pangeran anu nyifat di urang, geura urang terangkeun saeutik tina bagian pecahan nu 4 sareng nu 2 Tina Nafsiah, tegesna Wujud nu Maha Suci teh tetela ayana, eta Datna; tina Salbiah nya saksina nu Maha Suci, teu kenging ditandingkeun sarta di cita-cita kalawan diadegkeun ku urang, tah eta sifatna.
Demi af'alna, lantaran nu Maha Suci murahna ka kaayaan dunya miwah nu ngeusiannana ku Rohman Rohim Pangeran, nyakitu deui tumibana ka urang eta Rohman Rohim, ngajadikeun af'alna ku gelarna sifat Ma'ani.
tina rohman Kudrat jadi Anggahota
tina rohim Kudrat jadi Pangawasana
tina rohman Iradat jadi Jajantung
tina rohim Iradat jadi Kadaekna
tina rohman Elmu jadi Uteuk
tina rohim Elmu jadi Elingannana
tina rohman Hayat jadi Napas
tina rohim Hayat jadi Hurip
ku katerangan di luhur urang tetela pangakuan kana ayana Pageran teh da sidik sifat rohman rohimna geus nyifat sifat Ma'ani ka urang, ari dina pecahan 2 tea nyaeta istiqor sareng istigna, geuning ayi keur waktu tarekat bakal ningali cahaya lir kaya sumorotna panon poe ti pukul 9 dugi ka 11, tah rayi kapan sidik siloka anu maksudna urang kudu terang yen anu bisa tunggal jeung wujud (11) nu Maha Suci anging nu geus bisa nunggalkeun (Wahdaniat) atawa 9 tea, jadi seuhna.
9 -- Wahdaniat = tunggal
seuhna 11-- Wujud = aya
tapi awas rayi nu tunggal jeung nu Maha Suci teh kudu sifat nu Suci, lain Wahdaniat wadahna niat, ngan niat jeung niat bae, ari ngawujudkeun Suci mah tacan keneh, nggeus bae angkeuhan ngaku sajero tarekat nuggalkeun (akrob) jeung sagara ning Suci, puguh rayi si isun, mun boro-boro sasifat kapan kumawula oge can bisaeun, dibawa solat oge sok ngatrok bae, cing mangga rayi lenyepan, enya aya puji "Qodim Alal Qodim" tea mah, da gaib si isun mah sanes gaib Pangeran kapan gaib billa haefin tea, nu sok nyuwungkeun sifat nu aya, nya terus Asmauli Jinsi, ngajiniskeun Allah dunya tea, alias ........ Nur Cahaya.
Sareng deui rayi keur waktos ngagulungkeun sifat nu 4, ulah rumaos nyumponan dalil: Al Insanu Siri, enya lali ka diri hilap ka badan tea mah,atuh da eta mah pagawean si isun ana fana osok kitu sareng sanes antal maotu deuih, geura si isun ana boga kahayang sok tauhid, upamana nu bahari kaharti ku akal bae, lalakon Mi'radna si isun, upamana pareng urang jalan jalan di jalan gede, lar nu tumpak motor, leng bae si isun ka bengbat, terus mi'rad, ngimpi sajeroning rasa ngabogaan ata motor anclong-anclongan ka Pasar Baru sagala, kapan eta ayi geus lali ka diri tega ka badan, kapan suku mah terus leumpang tapi si isunna keur tumpak motor panggih jeung nu wawuh oge tara patanya, mun teu di gebah, tah kitu rayi kaayaan miradna si isun, tapi maaf rayi lain nuduh mirad sajero tarekat osok kitu, ngan ieu mah tadi ge ibarat.
Kamal : Parantos kang, rayi ngartos ngan eta ulah ngesek-ngesekkeun teuing, da rayi teh ayeuna mah ngartos rada beunta, ngan masih poekkeun rada teu ngartos, naha akang unggal nerangkeun pamendak wungkul nu kahartos ku akal bae, sedeng dalil-dalil nu tina kitab mah sok di ludat-ledot, kapan nu bener mah anging kitab ?
Kamil : Bener kitu rayi ?
Kamal : Sumuhun.
Kamil : Pamendak akang mah sanes, kitab mah ngan saukur bebeneran.
Kamal : Naha kitu, naon margina ?
Kamil : Sumuhun, geura mangga rayi nyandak kitab, naha nu baris maca teh rayi, atanapi kitab nu maca rayi?
Kamal : Teu ngartos.
Kamil : Kieu geura, rayi, ieu akang ngabantun cau, meureun nu di arah teh rasana.
Kamal : Sumuhun.
Kamil : Tah leres, namung lepat eta teh, kapan rasa mah parantos aya dina raos rayi, ngan amisna dina cau tegesna rasana ayi, amisna cau, nyakitu deui kana kitab, benerna aya di ayi, bebeneran aya dina kitab.
Kamal : Tah leres upami hayang bener kedah ngabantun bebeneran.
Kamil : Teu kedah, da bener mah teu tergantung ka bebeneran, sing emut, bener mah sanes bebeneran, lumpat mah sanes lulumpatan.
Kamal : Sanes kang, abdi mah lieur, ieu teh mending terang bae, ulah puter lidah, ari akang percaya henteu kana kitab ?
Kamil : Naha rayi naros kitu ?
Kamal : eta bae, ari salira akang teh ahli elmu, sedeng rupina ngalainkeun ka kitab, kapan nu matak ngelmu teh ngaku Islam panginten.
Kamil : Ari ngaku Islam mah henteu, da diajar keneh, mun ngaku keur nyungsi akang rumasa.
Kamal : Sumuhun sawios keur nyungsi oge ngan eta percanten kana kitab teh atanapi henteu ?
Kamil : Samemeh nerangkeun percanten henteuna akang tumaros heula naon henteunna percanten, sareng kapercantenan ?
Kamal : Kapercantenan mah padamelan, dupi percanten mah parantos didamel.
Kamil : Tah nuhun upami ayi ngartos mah, upami akang digawe tah naon rayi, nu dipigawe teh?
Kamal : nya pagawean ?
Kamil : upami percaya ?
Kamal : nya kapercayaan !
Kamil : tah kapercayaan saha ?
Kamal : nu tangtos kapercayaan jalmina anu percaya.
Kamil : tah geuning ngartos kapan percaya teh kana kapercayaan pribadina, sanes kanu sanes, atuh rayi ulah tumaros, akang percanten henteuna kana kitab, kapan kapercantenan ayi sanes keur akang, da persoon ayi sanes persoon akang, persoon akang sanes persoon ayi.
Kamal : Lieur kang, kapan akang teh palay sampurna, na naon atuh ari sampurna teh ?
Kamil : jalaran akang teu acan sampurna, jadi upami ayi hayang terang sampurna taroskeun bae ka nu sampurna.
Kamal : teu terang saha nu parantos sampurna.
Kamil : eta rayi uninga basa sampurna timana ?
Kamal : kenging tina buku-buku.
Kamil : tah atuh taroskeun bae kana buku.
Kamal : cing atuh kang sing leres bae ngawaleran teh, kapan saur akang keneh pang ngelmu teh pigeusaneun nyungsi kasampurnaan.
Kamil : sumuhun da kasampurnaan mah sanes sampurna.
Kamal : naon atuh ?
Kamil : Geus diterangkeun pang ngelmu teh pigeusaneun nyungsi kasampurnaan, samangsa-mangsa geus uninga kasampurnaan tah kakara nembe sampurna. Kapan ayeuna mah boro-boro sampurna kapan kasampurnaan oge nembe dipilari.
Kamal : kapan aya deui basa Insan Kamil Mukamil, hartina sampurnaning sampurna, bakal beak rasana jasmanina, jadi dat laesa kamislihi, naon ari eta kang ?
Kamil : eh, eta mah sampurna beak ayi, ari pamendak akang mah kecap sampurna teh Compleet; kieu geura:
keur jaman orok urang teh eling, ayeuna geus akir baleg urang ngarasa eling, tah dina eling na ulah hayang teu eling deui, tapi kedah gaduh tekad nyungsi sagaraning eling, kapan seueur paguron anu nekadkeun hayang teu eling deui , eta teh sampurna cenah, jadi Qamislihi deui; benerna mah nyungsi sagarana, tah sagarana nu pantes disebut sampurna mah, tapi lain eling wungkul, da tadi ge diterangkeun yen sampurna teh compleet, tegesna ari nu kagungan sifat sampurna mah anging Pangeran, ari eta Insan Kamil Mukamil bakal manjing kana Dat laesa qamislihi deui, eta oge leres teu aya lepatna, namung sahatea ? Si isun atanapi jirim jisim ?
Jirim, jisim mah pantes manjing kana Dat laesa deui oge, da sifatna itu, tapi urang nu kajadiannana tina sifat itu. Naha geus jadi insan ?
kapan ngigelkeun kamanusaan maka lagu Islam teh sakieu hesena, sok saliwang bae, boro-boro nincak laguna, nincak kecrekna oge salah bae,
Komo, Kamil,
Komo deui mukamil
wah ayi anggur jeung lalamunan jadi insan kamil mukamil mah mending diajar semedi, supaya ulah kabengbat ku pangreka paguron palsu, tapi semedi ge awas lain semedi ngeningkeun cipta, ngagedekeun cita-cita, atuh lapur deui eta mah kaasup kana elmu "Meditatie en Gedachten Concentratie" , gawena ngagulungkeun tekad, ari tekad-tekad si isun komo kitu digulungkeun, sasat lamun kuda teah mah dilepaskeun, nya terus nyebrut ka dunya deui bae, hayang mulya, hayang pinter, hayang maju, malah mun lugay ti Jasmani tea mah hayang nitis kanu leuwih senang ti batan ayeuna, ari ngaku elmu Allah, tapi gawena cedihan, embung mingpin anu miskin, embung nungtun nu dusun, tapi oborna mah Liefde (welas asih ka sasama) ngan sasamana lain sasama gumelar, tapi sasama saharkat, sasama samartabat, da ari kanu hina mah teu daek ngaku sasama, tara nulung kanu butuh nalang ka nu susah, ari manggih nu prihatin teh teu milu sedih anggur nyered ka papasten, kieu takdir kitu takdir, nuding kana pambalesan, welas asihna teh ngan saukur nyebut paingan: "De oorzak en 't gevolgd" tuluy semedi pagede-gede ciptaan, nlik takdir nyawang kadar, mugi-mugi ulah pinanggih prihatin , nyorang sagaraning lara, anggur hayang wuwuh-wuwuh dilahir ginanjar rahmat tah rayi nu kitu kaliru keneh, benerna nyifat pasifatan Allah mah enggon-enggoning miwelas miasih teh, teu pandang bulu teu pandang rupa, teu pandang kaya teu pandang miskin, teu pandang bangsa teu pandang agama, kasifat nu papada Gumelar mah welas asih bae, jeung teu pandang pamuji, teu pandang pamojok, estu iklas kumawulana ka anu dikawulaannana, geus iklas kana nafsu dunya, wungkul tauhid ka Yang Suksma, ulah cara ieu pangakuan mah teu takluk kana kahayangna nafsu (begeerteloos) tapi si isun anu kabur, diangon di tegal angkeuhan dirungruman kamulyaan alam dunya.
Tah kumargi eta, ku pangrasa akang mah, tinimbang ayi seueur miceun waktu anu percumah, anggur eta waktu teh geura anggo keur ta'udz (salindungan kahadean, anggangan kagorengan), da sanaos ayi seueur elmu, seueur aosan, seueur jampe sareng kitab-kitab oge, upami ayi teu kersa Ta'udz mah tetep Batal-na, hartosna moal soheh (sah) pangajina rayi teh, sareng sabalikna sanaos ayi teu tiasa maca, teu tiasa ngobrol oge, tapi ana kersa Ta'udz mah eta mah sami bae rayi teh geus bisa nyumponan kana ngaraning manusa nu katetepan ku kamanusaannana sareng moal keuna ku batal jeung haram sanaos aya di tempat mana oge; sakitu bae heulaanan ayi, atang-etang bantuneun rayi ka kota oleh-oleh ti urang Banjar Panemon.
Kaayaan kitu teu sabaraha lami, waktos anu ngajurung undur, burit nu ngajakan balik, geus meujeuhna wanci magrib, lajeng angkat ka tajug, di tengah empang ayana.
Henteu dinyanaan yen harita aya tamu, rayina ti kota jenengan Raden Kamal, nya lajeng bae raka rayi sembahyang di tajug. Sabada sembahyang lajeng lalinggih di tengah bumi paduduaan bari ngaleueut lalawuh candak ti kota. Rakana lajeng ngawitan tumaros :
Akang teu kinten atohna disumpingan salira ayi kumaha damang ?
Kamal : aya pangesto teu kirang sawios-wios, sareng pangdongkap rayi kadieu, kahiji : sono lawas teu tepang, kadua : ku hayang mudakarah ilmu, geusan bawaeun bekel nyungsi kasampurnaan.
Kamil : nuhun pisan kitu mah ayi, ciri manusa anu sah kamanusaannana, kudu kersa ngamudakarahkeun pamendak, naon tea anu ku ayi ngawitan deuk ditaroskeun ?
Kamal : bade tumaros: ari agama teh naon ? sareng mana rayi anu rada ewed, ceuk kaum ahrul sara: biasa bae nya-eta aturan-aturan anu dikudukeun ku kitab-kitab; demi ceuk ahrul Haq: eta mah lain agama tapi drigama, ari agama mah nya-eta elmu panyungsi diri pakeun jalan kasampurnaan.
Kamil : pamendak ahrul Sara bener, pamendak ahrul Haq bener. Ngan ari pamendak akang mah kieu : Agama teh asalna tina kecap Adin, hartina: "peraturan" tapi naha rayi rek ngagugulung peraturan bae, atawa rek terus ngaturna, tah dina ngaturna mah, tegesna peraturan teh kudu dipigawe, ku aturan eta urang tangtu boga kapercayaan, tegesna tarekatna Agama = nya kapercayaan; sanggeus urang boga kapercayaan nya tangtu urang boga cecekelan atawa ageman, tah haqna agama teh ageman, kantun ngawujudkeun patekadan urang kalawan prak kana ngalakukeun kabeneran, tah dimana geus ngawujud eta ma'ripatna agama, tegesna geus Suci tea atawa geus Islam tea.
Kamal : ari agama naon gunana ?
Kamil : lahirna supaya dunya beres sarta batinna supaya manusa bisa sampurna mulih ka jati mulang ka asal nyumponan dalil : Inna lillahi wa inna illahi rojiun.
Kamal : naha lahir tergantung ka batin ?
Kamil : Duanana sami, ngan panuhun akang, rayi ulah tumaros urusan lahir heulaanan, enya akang aya dina lahir tea mah, mung engke deui eta mah.
Kamal : naon ari lahir sareng naon ari batin ?
Kamil : lahir sifat nu kasar nu katingal ku panon kapala, demi batin nya-eta sifat nu gaib; anu aya tapi euweuh; anu euweuh tapi aya; karasa sareng katingal ku awasna perelmuan.
Kamal : Naha sanes ku panon Qolbi ?
Kamil : Upami rayi ningal barang Qodim tegesna gaib ku panon Qolbi, eta sanes anu saleresna, amung ku ciciptan bae, da panon Qolbi mah tergantung ka panon lahir, awasna qolbi nurutkeun awasna panon, geura mangga awasna qolbi ayi ayeuna awaskeun ka Mekkah tangtos kana teu awasna da urang acan jarah ka ditu.
Kamal : kantenan bae moal katingal mah da awas qolbi mah tegesna awasna qodim kapan paranti ningal nu qodim tegesna nu maha Suci, anu ceuk dalilna Ru'yatulahi ta'ala fie dunya biaenil qolbi.
Kamil : urusan dalil ru'yat enya henteuna eta tergantung ka pamanggih pangarangna, ngan mangga akal pikiran ayi geura bukakeun sina hirup, ulah percaya kana pangreka jelema kapan ceuk tadi ulah taqlid, kudu karasa kudu kaharti, ru'yat qolbi salawasna tergantung ka pamanggih ru'yat panon, geura ayi eta tingal nu gumebyar beureum, tangtos ru'yat qolbi ayi guguru heula ka panon kapala, tegesna ari uninga yen beureum, meureun bae da geus terang rupa beureum, nyakitu deui anu koneng, bodas sareng hideung, geura mun ayi tacan uninga sifat di lahir, kapan ka barang nu diaku ku ayi qodim moal tiasa ngareka rupana; mangga ayi nyandak jalmi lolong, tapi ulah nu lolong anyar; kedah nu lolong ti barang gubrag ka dunya, cik pek mangga titah tajali atawa tarekat, naha qolbina tiasa awas sareng terang kana sifat-sifatna ?
Kamal : urusan ru'yat qolbi mangke ditaroskeun deui kana kapentingan agama.
Kamil : atuh ru'yatna perelmuan oge engke deui bae, da kedah berhubungan sareng ru'yat qolbi.
Kamal : mangga, jalaran urusan ru'yat jadi seuhna perelmuan, engke urang pandeurikeun, ayeuna rayi tumaros, aya saur kieu :
"Maraneh kudu mikir kana dadamelan Allah, tapi ulah mikir kana Zat Allah, lantaran maneh moal bisa ngukur watesna", (duka bener, duka henteu, dalilna kieu : Tafakkaru fie chalqilahi wal tatafakaru fa inna kum lan taqdiru qadrahu).
Kamil : sa teu acanna ngajawab, akang gaduh panuhun, mugi ulah naroskeun dalil, ari dalil mah kudu kana kitab bae; surahna, sundana, malayuna, walandana, Inggrisna didinya aya kabeh.
Kamal : ke heula kang, nu mawi abdi naroskeun dicampuran dalil ka akang, kapan saur akang peraturan teh kudu bisa jadi kapercayaan, lantaran kapercayaan anu berhubungan urusan ka Allahan aya 2 tingkat ceuk ahrul Sara : Tafakkaru fie chal qilahi wala tata fakaru fa inna kum lan takdiru qadrahu, tah dalil eta nu dikuatkeun, ari ku elmu Haq, dalil ieu nu dikuatkeun : Awalahu wajibin allal insanu ma'rifatulohitaala bistiqoni (awalu dini marifatulohi) eta mana anu leres ?
Kamil : Sara leres, Haq leres.
Kamal : har, ari leres duanana mah atuh rayi ewed, anu mana nu kudu dibantun, sugan kumaha timbangan akang ?
Kamil : akang teu tiasa nimbang da sanes tukang timbang.
Kamal : ari akang tara nimbang-nimbang urusan dalil mah, abdi moal naroskeun deui timbangan, ayeuna mah rek naroskeun pamendak akang, ngabantun leres nu mana ?
Kamil : ari naroskeun pamendak akang mah mangga, akang rek nyokot nu aya saksina.
Kamal : kapan eta dalil parantos kasaksi ku kitab-kitab.
Kamil : upami rayi ngabantun tina kitab, disaksian ku kitab, disahkeun ku kitab, meureun benerna ge bener kitab eta mah, mana ari bener keur urang, cing rayi atuh sing emut naha kitab nu neangan kasampurnaan teh? atawa salira ayi ?
Kamal : kantenan abdi, ngan ngabantun jalan-jalanna tina kitab.
Kamil : upami rayi ngabantun tina kitab sareng nu dianggap sah ku rayi tina kitab enggeus bae ulah sok nyarita jeung papada manusa, kitab bae ajak mudakarah, meureunan sagala aya, da mudakarah jeung manusa mah kudu terang elmuning manusa, eta kapan rayi kapungkur geus jadi mu'alim, kapan lain mu'alim buaya ......... geuning ari pangakuan mah kapan jadi "mu'alim manusa" , tapi kakara jadi mu'alim kitab, da ku dumeh tacan terang elmuning manusa tea, tapi ayeuna mah sugan geugeuy.
Kamal : parantos kang tong diputer-puter abdi lieur, nu dianggo saksi ku akang upami sanes tina hadis dalil atanapi kitab anu mana atuh ?
Kamil : anu jadi saksi-saksi pikeun ngaenyakeun perelmuan akang oge ku tilu rupa : hiji akal dua pikiran tilu perasaan.
Kamal : tah eta 2 urusan, nya-eta Sara jeung Haq pamanggih geusan nerangkeun kaayaan Allah, anu kasaksi ku saksi-saksi akang, abdi ayeuna hayang terang anu mana anu leres.
Kamil : jadi saksi rasa, akal jeung pikiran rayi ayeuna rek milu nyaksian ka nu geus kasaksi ku saksi-saksi akang tea ?
Kamal : Sumuhun ?
Kamil : urusan dalil tafakkaru nu dikuatkeun ku ahli Sara, eta oge bener, margi ngabantun saksi kitab, nya kitu deui dalil Awalu wjibin, eta oge bener da kasaksi ku kanyataan pamanggih manehna, kalawan kasaksi ku imanna keur waktu tajali, ayeuna nerangkeun elmuning akang nu kapanggih sarta kasaksi ku akang kana dadamelannana ku percaya jeung ma'rifat oge kudu, tapi papada ma'rifat oge lain ngajinis kasaksi ku pancadria urang mah, ngan ma'rifat ka ayana Allah ku awasna elmu tea, tadi kapan ku ayi urusan awas ulah waka diterangkeun, engke bae pandeuri lantaran penting teuing, tegesna meureun ayi seueur keneh ka panasaran geusan tumaros hal ilmi kabatinan ka akang, sareng akang bade tumaros reh rayi geus lampar pamendak, kenging oge disebatkeun gudangna elmu, sareng ceuk wartos ayi geus nyekel tarekat kawalian anu sajati, cing mangga pedarkeun ulah disumputkeun geuning da kitab oge nyarek, buktina aya saur kieu :
"Saha-saha nu ditanya tina hal elmu tapi manehna teu nerangkeun, tangtu manehna dina poe Qiamat dikadalian ku kadali seuneu". (Man su ila an ilmin fa katamhu uljima yaumal qiyamatibi lijamin min-naar?)
tah geuning sanajan kitab oge sakitu nyarekna ulah sok nyumputkeun kanyaho, sareng eta ayi katingal ngabantun wawacan sareng buku-buku cing mangga geura wejangkeun.
Kamal : Jalaran ieu kitab, upami diwejang hiji-hiji kacida lamina ayeuna urang candakan nu parentingna bae, lajeng urang munajarahkeun, nu katimbang sae urang bantun anu salah urang tunda, tapi boa raos rayi teu aya lepatna da sadayana nyata dina salira.
Kamil : kitu mangga atuh.
Kamal : ngawitan nerangkeun dalil : Man arofa nafsahu faqod arofa robahu, sareng Man arofa robahu, faqod jahilan nafsahu. Sundana : saha-saha nu nyaho ka dirina, tangtu nyaho ka Pangeranna, sareng Saha-saha nu geus nyaho ka Pangeranna tangtu dirina ngarasa bodo.
tah eta kang dalil pang pentingna anu matak urang kudu ma'rifat teh geura kanyahokeun jatining ingsun, tangtu engke ma'rifat ka Allah, sareng engke upami parantos marifat ka Allah, tangtos urang salamina ngaraos teu daya teu upaya usik malik anging ku pangawasa anjeuna anu ceuk dalilna deui : wahua ma akum aenama kuntum.
Kamil : Titadi akang parantos nerangkeun yen dalil mah urusan kitab jadi ayeuna akang kana dalilna mah teu rek pipilueun ngan akang sakadar rek nerangkeun dina surahanana bae nu ku rayi ayeuna didamel ageman. Saha-saha nu nyaho kana dirina, tangtu nyaho ka Pangeranna, tah eta bahasa Sunda nu eces nu nyata kalawan tetela, nerangkeun yen upami nyaho kana diri, tangtu nyaho ka Pangeran, awas rayi, ari diri teh lain urangna, lain Ingsunna, diri mah jirim jeung jisim, ceuk bahasa Walanda mah : stoffelijke lichaam en astraal lichaam, jadi tegesna upami rayi uninga yen "urangna" disifatan ku jirim sareng jisim (rohman-rohim) tangtu terang ka nu kagungan eta persifatan, nyatana nya Maha Suci tea.
Sanggeusna urang terang ka nu nyifat ka urang, kakara urang sing rumasa Lahaula tea, tah rayi nu Lahaula mah jatining ingsun tea.
Kamal : Sumuhun ngartos ayeuna, bet tebih sareng surahan nu sanes.
Kamil : Tong disebat nyurahkeun, akang mah teu patali jeung dalil ngan eta rayi ngartos atanapi henteu ?
Kamal : Ngartos, ..........
Tumaros deui dina ieu kitab ditulis, yen Kj Nabi Muhammad teu pupus, sabab lamun anjeunna pupus alam dunya oge moal aya, pupus soteh majajina nu Sumare di Madinah tapi Hakekina mah aya di urang, nu matak wajib dikanyahokeun.
Kamil : Jadi tegesna maksud eta kitab majajina aya di Mekkah, hakekina aya di urang ?
Kamal : Sumuhun kitu ...........
Kamil : Eta ku pikiran rayi kumaha ?
Kamal : Bubuhan abdi mah parantos tarekat jadi percanten bae kitu.
Kamil : Eta katimbang ku akal pikiran sehat ?
Kamal : Raraosan mah ku pikiran sehat da puguh geus nyata.
Kamil : Ari nyata-nyata kitu mangsa bodo rayi, ngan akang rek naros saeutik, ari akrobna Majaji jeung Hakekina dina naon ?
Kamal : Dina Wujud !
Kamil : Tah geuning ngartos, ayeuna akang naros deui, ari majaji ayi akrobna sareng hakeki ayi dimana ?
Kamal : nya dina wujud rayi.
Kamil : Nu tangtos dina wujud rayi, lajeng diasmaan Kamal.
Kamal : Sumuhun.
Kamil : Tah geuning kahartos, ayeuna piraku bisa jadi, majaji aya di tanah Mekkah, ari hakekina di Pulo Jawa, kapan majaji tara jauh ti hakekina, majaji ayi tunggal jeung hakeki ayi, piraku pipisahan, komo ieu nu lain-lainna deui, beda bangsa beda martabat, ceuk cohagna mah pamohalan aya majaji onta hakekina kuda, jeung deui ari elmu di urang enya oge make ngaran Muhammad majaji, Muhammad hakeki, enya make ngaran Muhammad tea mah, tapi ulah nyabit-nyabit ka Muhammad Kj. Nabi, ieu mah Muhammad lalandihan tukang elmu bae, tegesna teu patali jeung itu.
Kamal : Nuhun abdi diwartosan anu jelas, ayeuna rek naroskeun sifat anu 20 -- tapi moal ditata sahiji-sahiji, bilih ka bujeng wengi, bade dipecahan 4 bae. Nafsiah, Salbiah, Ma'ani, Ma'nawiah.
nafsiah nyatana napas
salbiah nyatana panon (heherangna)
ma'ani nyatana lelegok ceuli
ma'nawiah nyatana sungut,
eta kumaha sami sareng pamendak akang ?
Kamil : Ari ayi ku pecahan 4 dina sifat 20 teh ngawincik sifatna Allah ? Atawa ngawincik pancadria ayi ?
Kamal : Ari sifatna mah sifat Allah, mung bae kapan lamun milari Pangeran kaluar tina diri tangtos kasasar.
Kamil : Naha lamun ayi parantos terang kana napas, panon, ceuli, sungut, naha ayi parantos ngaraos panggih sareng Allah ?
Kamal : Kapan didinya ayana tarekat jati, saparantos terang sifat nu 4.
Kamil : Akang teu naroskeun gumulungna sifat nu 4 dina keur waktu tarekat, naros soteh sifat-sifatna, piraku aya sifat Allah dina ceuli, dina sungut, kapan sifat 20 mah kaayaan Allah 20 sifat, kapan ceuk tadi oge sifat 20 mah katerangan, tegesna katerangan geusan neangan Allah kudu make sifat 20, jeung deui lamun rayi ngawincik sifat nu 20 dina ceuli, mana atuh langgengna ?
Kamal : Dina Qodimna.
Kamil : Naon Qodimna teh ?
Kamal : Qodim napas angseu
Qodim ceuli denge
Qodim panon awas
Qodim sungut ucap,
anu matak didinya aya puji Qodim alal Qodim, hartina : Sumembah ka sifat Qodim mah kudu ku Qodim deui.
Kamil : Ke heula nyarion teh ulah waka uclag-aclog, akang mah naroskeun nu langgengna.
Kamal : Sumuhun nu langgeng mah sifat "Qodim".
Kamil : Upami rayi keukeuh mempertahankeun hal nu dianggap ku rayi qodim ayeuna sawios, ngan akang deuk naroskeun enggoning rayi nganggap sifat 20 aya dina salira, jalaran milari Pangeran ulah kaluar tina tangtungeun salira, naha pangraos ayi Allah teh aya dina salira ayi.
Kamal : Aya !
Kamil : Atuh aya di unggal jalmi mah seueur .
Kamal : Kang ulah lepat faham pang nyebatkeun aya Allah di badan, tegesna Allah angliputi urang kalawan Kudrat, Iradat, Ilmuna, jadi sategesna mah aya sifat hirup di urang.
Kamil : Naha henteu 20 hannana ngaliputan salira rayi, bet Qudrat, Iradat Ilmu wungkul ?
Kamal : Sadayana oge ngaliputan.
Kamil : Ari Kiamuhuta'alabinafsihina, saha nu ngadeg ku anjeun ?
Kamal : Allah !
Kamil : Ari rayi ngadeg ku anjeun ?
Kamal : Kantenan ti sabarang emut oge rayi geus kieu da buktina teu inget ka alam asal.
Kamil : Har, kumaha ari ayi, ari ngangken geus marifat ka Allah, tapi luak leok ka alam teu inget, ana kitu engke rayi ngangken ka Allah ka kaula-Na.
Kamal : Sumuhun raos rayi kalawan katerangan tina sifat 20 kaulana tea nu dianggap Pangeran, jalaran kapan dina seuhna perelmuan geusan nyungsi jatining rasa, sedeng kapan ceuk dalil oge, rasa isun ya rasa gusti (al insanu siri waana siruhu).
Kamil : Rayi, kapan akang parantos seseepan dina buku taudz nerangkeun yen sakadang isun mah sagirna tina idajil, sareng deui mungguh kaayaan isun sareng kaula tea teu kinten bentenna, ari isun mah nya nu parantos diterangkeun tea, ari kaula mah hiji titel (asmana) si ingsun anu geus kumawula, tapi kade rayi dina enggon-enggoning kumawula sing emut, sanes kumawula ka dunya, atuh eta mah kaulaning dunya, tapi kedah kumawula ka gusti kakara jadi kaulaning Gusti, sareng deui ari pecahan sipat 20 mah bagian Nfsiah, Salbiah, Maani, sareng Manawiah teu kenging disalang surupkeun kana napas, ceuli, sareng sungut, da eta mah wincikan Jasmani, da sifat Pangeran mah sifat Goib, jadi nu diwincik teh kedah goibna bae, kitu oge upami parantos af'al kana kaayaan goibna diri ulah ari diaku sifatna Pangeran mah, kudu ngaku soteh af'al kana sifat Pangeran anu nyifat di urang, geura urang terangkeun saeutik tina bagian pecahan nu 4 sareng nu 2 Tina Nafsiah, tegesna Wujud nu Maha Suci teh tetela ayana, eta Datna; tina Salbiah nya saksina nu Maha Suci, teu kenging ditandingkeun sarta di cita-cita kalawan diadegkeun ku urang, tah eta sifatna.
Demi af'alna, lantaran nu Maha Suci murahna ka kaayaan dunya miwah nu ngeusiannana ku Rohman Rohim Pangeran, nyakitu deui tumibana ka urang eta Rohman Rohim, ngajadikeun af'alna ku gelarna sifat Ma'ani.
tina rohman Kudrat jadi Anggahota
tina rohim Kudrat jadi Pangawasana
tina rohman Iradat jadi Jajantung
tina rohim Iradat jadi Kadaekna
tina rohman Elmu jadi Uteuk
tina rohim Elmu jadi Elingannana
tina rohman Hayat jadi Napas
tina rohim Hayat jadi Hurip
ku katerangan di luhur urang tetela pangakuan kana ayana Pageran teh da sidik sifat rohman rohimna geus nyifat sifat Ma'ani ka urang, ari dina pecahan 2 tea nyaeta istiqor sareng istigna, geuning ayi keur waktu tarekat bakal ningali cahaya lir kaya sumorotna panon poe ti pukul 9 dugi ka 11, tah rayi kapan sidik siloka anu maksudna urang kudu terang yen anu bisa tunggal jeung wujud (11) nu Maha Suci anging nu geus bisa nunggalkeun (Wahdaniat) atawa 9 tea, jadi seuhna.
9 -- Wahdaniat = tunggal
seuhna 11-- Wujud = aya
tapi awas rayi nu tunggal jeung nu Maha Suci teh kudu sifat nu Suci, lain Wahdaniat wadahna niat, ngan niat jeung niat bae, ari ngawujudkeun Suci mah tacan keneh, nggeus bae angkeuhan ngaku sajero tarekat nuggalkeun (akrob) jeung sagara ning Suci, puguh rayi si isun, mun boro-boro sasifat kapan kumawula oge can bisaeun, dibawa solat oge sok ngatrok bae, cing mangga rayi lenyepan, enya aya puji "Qodim Alal Qodim" tea mah, da gaib si isun mah sanes gaib Pangeran kapan gaib billa haefin tea, nu sok nyuwungkeun sifat nu aya, nya terus Asmauli Jinsi, ngajiniskeun Allah dunya tea, alias ........ Nur Cahaya.
Sareng deui rayi keur waktos ngagulungkeun sifat nu 4, ulah rumaos nyumponan dalil: Al Insanu Siri, enya lali ka diri hilap ka badan tea mah,atuh da eta mah pagawean si isun ana fana osok kitu sareng sanes antal maotu deuih, geura si isun ana boga kahayang sok tauhid, upamana nu bahari kaharti ku akal bae, lalakon Mi'radna si isun, upamana pareng urang jalan jalan di jalan gede, lar nu tumpak motor, leng bae si isun ka bengbat, terus mi'rad, ngimpi sajeroning rasa ngabogaan ata motor anclong-anclongan ka Pasar Baru sagala, kapan eta ayi geus lali ka diri tega ka badan, kapan suku mah terus leumpang tapi si isunna keur tumpak motor panggih jeung nu wawuh oge tara patanya, mun teu di gebah, tah kitu rayi kaayaan miradna si isun, tapi maaf rayi lain nuduh mirad sajero tarekat osok kitu, ngan ieu mah tadi ge ibarat.
Kamal : Parantos kang, rayi ngartos ngan eta ulah ngesek-ngesekkeun teuing, da rayi teh ayeuna mah ngartos rada beunta, ngan masih poekkeun rada teu ngartos, naha akang unggal nerangkeun pamendak wungkul nu kahartos ku akal bae, sedeng dalil-dalil nu tina kitab mah sok di ludat-ledot, kapan nu bener mah anging kitab ?
Kamil : Bener kitu rayi ?
Kamal : Sumuhun.
Kamil : Pamendak akang mah sanes, kitab mah ngan saukur bebeneran.
Kamal : Naha kitu, naon margina ?
Kamil : Sumuhun, geura mangga rayi nyandak kitab, naha nu baris maca teh rayi, atanapi kitab nu maca rayi?
Kamal : Teu ngartos.
Kamil : Kieu geura, rayi, ieu akang ngabantun cau, meureun nu di arah teh rasana.
Kamal : Sumuhun.
Kamil : Tah leres, namung lepat eta teh, kapan rasa mah parantos aya dina raos rayi, ngan amisna dina cau tegesna rasana ayi, amisna cau, nyakitu deui kana kitab, benerna aya di ayi, bebeneran aya dina kitab.
Kamal : Tah leres upami hayang bener kedah ngabantun bebeneran.
Kamil : Teu kedah, da bener mah teu tergantung ka bebeneran, sing emut, bener mah sanes bebeneran, lumpat mah sanes lulumpatan.
Kamal : Sanes kang, abdi mah lieur, ieu teh mending terang bae, ulah puter lidah, ari akang percaya henteu kana kitab ?
Kamil : Naha rayi naros kitu ?
Kamal : eta bae, ari salira akang teh ahli elmu, sedeng rupina ngalainkeun ka kitab, kapan nu matak ngelmu teh ngaku Islam panginten.
Kamil : Ari ngaku Islam mah henteu, da diajar keneh, mun ngaku keur nyungsi akang rumasa.
Kamal : Sumuhun sawios keur nyungsi oge ngan eta percanten kana kitab teh atanapi henteu ?
Kamil : Samemeh nerangkeun percanten henteuna akang tumaros heula naon henteunna percanten, sareng kapercantenan ?
Kamal : Kapercantenan mah padamelan, dupi percanten mah parantos didamel.
Kamil : Tah nuhun upami ayi ngartos mah, upami akang digawe tah naon rayi, nu dipigawe teh?
Kamal : nya pagawean ?
Kamil : upami percaya ?
Kamal : nya kapercayaan !
Kamil : tah kapercayaan saha ?
Kamal : nu tangtos kapercayaan jalmina anu percaya.
Kamil : tah geuning ngartos kapan percaya teh kana kapercayaan pribadina, sanes kanu sanes, atuh rayi ulah tumaros, akang percanten henteuna kana kitab, kapan kapercantenan ayi sanes keur akang, da persoon ayi sanes persoon akang, persoon akang sanes persoon ayi.
Kamal : Lieur kang, kapan akang teh palay sampurna, na naon atuh ari sampurna teh ?
Kamil : jalaran akang teu acan sampurna, jadi upami ayi hayang terang sampurna taroskeun bae ka nu sampurna.
Kamal : teu terang saha nu parantos sampurna.
Kamil : eta rayi uninga basa sampurna timana ?
Kamal : kenging tina buku-buku.
Kamil : tah atuh taroskeun bae kana buku.
Kamal : cing atuh kang sing leres bae ngawaleran teh, kapan saur akang keneh pang ngelmu teh pigeusaneun nyungsi kasampurnaan.
Kamil : sumuhun da kasampurnaan mah sanes sampurna.
Kamal : naon atuh ?
Kamil : Geus diterangkeun pang ngelmu teh pigeusaneun nyungsi kasampurnaan, samangsa-mangsa geus uninga kasampurnaan tah kakara nembe sampurna. Kapan ayeuna mah boro-boro sampurna kapan kasampurnaan oge nembe dipilari.
Kamal : kapan aya deui basa Insan Kamil Mukamil, hartina sampurnaning sampurna, bakal beak rasana jasmanina, jadi dat laesa kamislihi, naon ari eta kang ?
Kamil : eh, eta mah sampurna beak ayi, ari pamendak akang mah kecap sampurna teh Compleet; kieu geura:
keur jaman orok urang teh eling, ayeuna geus akir baleg urang ngarasa eling, tah dina eling na ulah hayang teu eling deui, tapi kedah gaduh tekad nyungsi sagaraning eling, kapan seueur paguron anu nekadkeun hayang teu eling deui , eta teh sampurna cenah, jadi Qamislihi deui; benerna mah nyungsi sagarana, tah sagarana nu pantes disebut sampurna mah, tapi lain eling wungkul, da tadi ge diterangkeun yen sampurna teh compleet, tegesna ari nu kagungan sifat sampurna mah anging Pangeran, ari eta Insan Kamil Mukamil bakal manjing kana Dat laesa qamislihi deui, eta oge leres teu aya lepatna, namung sahatea ? Si isun atanapi jirim jisim ?
Jirim, jisim mah pantes manjing kana Dat laesa deui oge, da sifatna itu, tapi urang nu kajadiannana tina sifat itu. Naha geus jadi insan ?
kapan ngigelkeun kamanusaan maka lagu Islam teh sakieu hesena, sok saliwang bae, boro-boro nincak laguna, nincak kecrekna oge salah bae,
Komo, Kamil,
Komo deui mukamil
wah ayi anggur jeung lalamunan jadi insan kamil mukamil mah mending diajar semedi, supaya ulah kabengbat ku pangreka paguron palsu, tapi semedi ge awas lain semedi ngeningkeun cipta, ngagedekeun cita-cita, atuh lapur deui eta mah kaasup kana elmu "Meditatie en Gedachten Concentratie" , gawena ngagulungkeun tekad, ari tekad-tekad si isun komo kitu digulungkeun, sasat lamun kuda teah mah dilepaskeun, nya terus nyebrut ka dunya deui bae, hayang mulya, hayang pinter, hayang maju, malah mun lugay ti Jasmani tea mah hayang nitis kanu leuwih senang ti batan ayeuna, ari ngaku elmu Allah, tapi gawena cedihan, embung mingpin anu miskin, embung nungtun nu dusun, tapi oborna mah Liefde (welas asih ka sasama) ngan sasamana lain sasama gumelar, tapi sasama saharkat, sasama samartabat, da ari kanu hina mah teu daek ngaku sasama, tara nulung kanu butuh nalang ka nu susah, ari manggih nu prihatin teh teu milu sedih anggur nyered ka papasten, kieu takdir kitu takdir, nuding kana pambalesan, welas asihna teh ngan saukur nyebut paingan: "De oorzak en 't gevolgd" tuluy semedi pagede-gede ciptaan, nlik takdir nyawang kadar, mugi-mugi ulah pinanggih prihatin , nyorang sagaraning lara, anggur hayang wuwuh-wuwuh dilahir ginanjar rahmat tah rayi nu kitu kaliru keneh, benerna nyifat pasifatan Allah mah enggon-enggoning miwelas miasih teh, teu pandang bulu teu pandang rupa, teu pandang kaya teu pandang miskin, teu pandang bangsa teu pandang agama, kasifat nu papada Gumelar mah welas asih bae, jeung teu pandang pamuji, teu pandang pamojok, estu iklas kumawulana ka anu dikawulaannana, geus iklas kana nafsu dunya, wungkul tauhid ka Yang Suksma, ulah cara ieu pangakuan mah teu takluk kana kahayangna nafsu (begeerteloos) tapi si isun anu kabur, diangon di tegal angkeuhan dirungruman kamulyaan alam dunya.
Tah kumargi eta, ku pangrasa akang mah, tinimbang ayi seueur miceun waktu anu percumah, anggur eta waktu teh geura anggo keur ta'udz (salindungan kahadean, anggangan kagorengan), da sanaos ayi seueur elmu, seueur aosan, seueur jampe sareng kitab-kitab oge, upami ayi teu kersa Ta'udz mah tetep Batal-na, hartosna moal soheh (sah) pangajina rayi teh, sareng sabalikna sanaos ayi teu tiasa maca, teu tiasa ngobrol oge, tapi ana kersa Ta'udz mah eta mah sami bae rayi teh geus bisa nyumponan kana ngaraning manusa nu katetepan ku kamanusaannana sareng moal keuna ku batal jeung haram sanaos aya di tempat mana oge; sakitu bae heulaanan ayi, atang-etang bantuneun rayi ka kota oleh-oleh ti urang Banjar Panemon.
Tidak ada komentar:
Posting Komentar